Ысык-Көлдө 350 миң долларга фитосанитардык лаборатория курулууда
Ысык-Көл облусунда өсүмдүктөрдүн карантини боюнча заманбап лаборатория курулууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Долбоор Суу ресурстары, айыл чарба жана кайра иштетүү өнөр жайы министрлигине караштуу Өсүмдүктөрдү химиялаштыруу, коргоо жана карантин департаменти тарабынан, Ислам Өнүктүрүү Банкынын каржылоосу менен ишке ашырылат.
Лаборатория Балыкчы шаарында курулуп, заманбап лабораториялык жабдуулар, оргтехника жана эмеректер менен жабдылат. Жалпы инвестиция 350 миң АКШ долларын түзөт.
Өсүмдүктөрдү химиялаштыруу, коргоо жана карантин департаментинин директору Максат Кочеров Ислам Өнүктүрүү Банкынын жана ЮниХелп компаниясынын өкүлдөрү менен жолугушуп, лабораториялык жабдуулар жана эмеректерди алуу үчүн 14 170 121 сомдук келишимге кол коюшту.
Бул карантиндик фитосанитардык лаборатория Ысык-Көл жана Нарын облустарында фитосанитардык коопсуздукту камсыз кылуу үчүн маанилүү кадам болуп эсептелет. Лаборатория зыянкечтерден келтирилген зыянды азайтып, жаратылыш ресурстарын коргоого жана региондун экономикасын чыңдоого мүмкүндүк берет. Заманбап лаборатория ошондой эле айыл чарба жана токой ресурстарын сактоо, экологиялык коопсуздукту камсыз кылуу үчүн ишенимдүү инструмент болот.
