Аялдар менен 18 жашка чейинкилер үчүн жаңы жүк көтөрүү нормалары бекитилди
Кыргыз Республикасында аялдар жана 18 жашка чейинки кызматкерлер үчүн мүмкүн болгон жүк көтөрүү нормалары бекитилди
Министрлер кабинети аялдар жана 18 жашка чейинки кызматкерлер үчүн кол менен оор жүктөрдү көтөрүү жана жылдыруу учурундагы максималдуу физикалык жүктөмдөрдүн жаңыланган нормаларын бекитти.
Мурдагы нормаларда 18 жашка чейинки өспүрүмдөр жана аялдар 7 килограммдан 10 килограммга чейинки жүктү кол менен көтөрүүгө болору көрсөтүлгөн.
Документ Эмгек кодексинин 139-беренесин аткаруунун алкагында кабыл алынып, аталган категориядагы кызматкерлер кол менен канча салмактагы жүктү көтөрүүгө жана жылдырууга уруксат берилерин аныктайт. Нормалар эки тиркемеде бекитилген: бири — жашы жете элек кызматкерлер үчүн, экинчиси — аялдар үчүн.
Токтомдо белгиленгендей, жаңы талаптар менчик түрүнө жана ишмердүүлүгүнүн багытына карабастан бардык уюмдар үчүн милдеттүү болуп саналат. Ошол эле учурда 2005 жана 2012-жылдары кабыл алынган, ушул сыяктуу нормаларды жөнгө салган өкмөттүн мурдагы эки токтому күчүн жоготту.
Белгиленген талаптардын сакталышын көзөмөлдөө эмгек мыйзамдарынын аткарылышын көзөмөлдөө жана бакйоо боюнча ыйгарым укуктуу мамлекеттик органга жүктөлдү.
