Экспорт, түшүм жана реформа боюнча айыл чарба жетишкендиктери
Суу ресурстары, айыл чарба жана кайра иштетүү өнөр жайы министрлиги 2025-жылдын жыйынтыктарын чыгарып, тармакта системалуу өсүш жана маанилүү жетишкендиктер катталганын билдирди.
Маалыматка ылайык, республика боюнча 86 үрөнчүлүк чарба иштеп, 11 айда 4 485 тонна сапаттуу буудай үрөнү даярдалды. Үрөн алуучулардын саны 2 782ге жетип, өткөн жылга салыштырмалуу 14 пайызга өстү. Ошондой эле 15 млн 37 миң көчөт өстүрүлүп, импортко көз карандылык кыскарды.
Экспорт багытында да алгачкы жетишкендиктерге жетишилди. Кыргызстан тарыхында биринчи жолу 40 тонна беде үрөнү Россияга, 1,6 тонна ашкабак үрөнү Японияга экспорттолду.
Жалпы айдоо аянты 1 млн 245,6 миң гектарды түзүп, дан эгиндеринен 2,3 млн тоннадан ашык дүң түшүм алынды. Картошка, жашылча жана бакча өсүмдүктөрү боюнча да жогорку көрсөткүчтөр катталды.
Мал чарбасында алгач ирет мамлекеттик бюджеттен 60 млн сомдон ашык каражат бөлүнүп, 270 миң доза асыл тукум бука уругу акысыз таратылды. Натыйжада 77 миңден ашуун уй-кунажын жасалма уруктандыруудан өткөрүлдү. Учурда өлкөдө 302 уруктандыруу пункту иштеп, 185 асыл-тукум чарба катталган.
Министрлик 3%дык жеңилдетилген насыя берүү, жогорку түшүмдүү өсүмдүктөрдү жайылтуу, органикалык өндүрүштү өнүктүрүү жана экспортту кеңейтүү багытындагы иштерди улантууда.
