Токмок мал базары 1-январда жабылат
Токмок шаарындагы мал базары 1-январдан тартып ишин токтоторун шаар мэриясынан билдиришти.
Маалыматта базар коммерциялык негизде иштеп келгени, бирок анын ээлери объекттин санитардык жана техникалык абалын тийиштүү деңгээлде камсыздабаганы айтылат.
Базарды жабууга ветеринардык-санитардык, санитардык-эпидемиологиялык жана экологиялык талаптардын системалуу түрдө бузулушу, ошондой эле коопсуздук жана инфраструктура боюнча белгиленген нормаларга жооп бербегени негиз болгон.
Буга чейин Чүй облусундагы президенттин ыйгарым укуктуу өкүлү текшерүүнүн жыйынтыгында базардын абалын кескин сынга алып, антисанитария, өтмөктөрдүн суу алдында калышы, малды алып келүүгө тийиштүү көзөмөлдүн жоктугу жана ветеринардык документациянын талаптагыдай жүргүзүлбөгөндүгүн белгилеген.
Коомчулуктагы резонанска социалдык тармактарда тараган видео да себеп болгон. Анда жамгырдан кийин базардын аймагы толугу менен суу каптап, айлананын баары ылай жана таштандыларга толуп калганы көрсөтүлгөн.
