11 айда 203,7 миң м³ карантиндик объект зыянсыздандырылды
Суу ресурстары, айыл чарба жана кайра иштетүү өнөр жайы министрлигине караштуу Өсүмдүктөрдү химиялаштыруу, коргоо жана карантин департаменти карантинге алынган объекттерди газациялоо жана дегазациялоо ыкмасы менен зыянсыздандыруу иштерин уюштурууда.
Министрликтин маалыматына ылайык, 2025-жылдын 11 айынын жыйынтыгы боюнча аймактык башкармалыктар тарабынан газдык жана аэрозолдук ыкмалар аркылуу жалпы көлөмү 203 745 м³ болгон объекттерде зыянсыздандыруу иштери жүргүзүлдү. Бул иштер жыгач түп кармагычтарга, таңгактоочу жана бекитүүчү материалдарга, кургатылган мөмө-жемиштерге, дан жана буурчак өсүмдүктөрүнө, көчөттөргө, кампа жайларына жана үрөн чарбаларына карата аткарылды.
Аткарылган иштердин ичинен 156 960 м³ көлөмү көчөттөргө жана кампа жайларына туура келсе, 46 785 м³ таңгактоочу материалдарга, кургатылган мөмө-жемиштерге, дан жана буурчак өсүмдүктөрүнө тиешелүү болду.
Бул иш-чаралар өсүмдүк карантининин талаптарын сактоого, зыяндуу организмдердин жайылышын алдын алууга жана айыл чарба продукциясынын коопсуздугун камсыздоого багытталган.
