2026-жылдын январында Казакстанда 19 жумушчу күн болот, Кыргызстандачы?
2026-жылдын башы казакстандыктарды узак майрам менен кубандырат. Январь айында тургундар Жаңы жыл майрамдары, дем алыш күндөрү жана Рождество майрамдарынан улам айдын дээрлик жарымын эс алышы күтүлөт.
Тengrinews.kz Казакстандыктар январь айында канча күн эс ала тургандыгын, бүгүн Казак Республикасынын Эмгек жана социалдык коргоо министрлигине таянып жарыялашты. Ага ылайык, кошуна мамлекетте 2026-жылдын январь айында дем алыш күндөрдүн графигине эч кандай өзгөртүүлөр киргизилбегендиги тастыкталды.
Билдирүүгө караганда, аларда январь айындагы эс алуу күндөрүнүн саны иш жумалыгынын узактыгына жараша болот:
· 5 күндүк иш жумалыгында казакстандыктар 12 күн эс алып, 19 күн иштешет;
· 6 күндүк иш жумалыгында - 7 күн гана эс алып, 24 жумушчу күн иштешет.
Тагыраагы казакстандыктардын 2026-жылдын январында эс алуу жана жумуш күндөрүнүн графиги төмөнкүдөй:
1 жана 2-январь Жаңы жылдык майрамдар;
3 жана 4-январь дем алыш күндөрү;
5 жана 6-январь жумуш күндөрү;
7-январь – Рождество майрамы.
Ал эми Кыргыз Республикасынын Эмгек жана социалдык өнүктүрүү министрлиги 2026-жылы Жаңы жылдык эс алууларды узартуу боюнча ири масштабдуу долбоорду коомдук талкууга койгондугу жарыяланган.
Бирок, азыркы тапта бул тууралуу токтом чыга электигин министрликтен кабарлашты. Сунушка ылайык, кыргызстандыктар 1-январдан 12-январга чейин, башкача айтканда, катары менен 11 күн үзгүлтүксүз эс алууга чыгышы мүмкүндүгү божомолдонууда.
