Бул жылы кайра иштетүү өнөр жайында 95,2 млрд сомдук продукция өндүрүлдү
2025-жылы Суу ресурстары, айыл чарба жана кайра иштетүү өнөр жайы министрлигинин макроэкономикалык абалы туруктуу сакталып, айыл чарба продукциясынын дүң өндүрүү көлөмү 437 миллиард сомдон ашты. Бул көрсөткүч өткөн жылга салыштырмалуу 102%ды түздү.
Министрликтин маалыматына ылайык, кайра иштетүү өнөр жай продукцияларынын өндүрүшү 95 миллиард 230 миллион сомго жетип, өткөн жылга салыштырмалуу 15 миллиард 31 миллион сомго көбөйдү. Бул кайра иштетүү тармагындагы ишканалардын ишмердүүлүгү жанданып, кошумча нарк жаратуу күч алганын көрсөтөт.
Өлкө калкы негизги тамак-аш азыктарынын 9 түрүнүн ичинен 6 түрү — сүт, эт, картошка, жашылча, кумшекер жана жумуртка менен толук камсыздалды. Бул ички рынокту өз продукциябыз менен камсыздоодо маанилүү жетишкендик болуп эсептелет.
Мындан тышкары, 2025-жылдан тартып жеңилдетилген насыялар 5 мамлекеттик программанын алкагында берилүүдө. Бул максатта жалпы 12 миллиард 242 миллион сом каралып, анын 11 миллиард сомдон ашыгы өздөштүрүлдү. Бул чаралар дыйкандарды, фермерлерди жана кайра иштетүүчү ишканаларды колдоого багытталган.
