Эт импорту боюнча тарифтик квоталар санарип форматка өткөрүлүүдө
Суу ресурстары, айыл чарба жана кайра иштетүү өнөр жайы министрлиги айрым эт түрлөрүн импорттоого берилүүчү тарифтик квоталар боюнча арыздарды иштеп чыгуу үчүн жаңы автоматташтырылган маалыматтык системаны тажрыйбалык эксплуатацияга киргизүүдө.
Министрликтин маалыматына ылайык, жаңы система тарифтик квоталарды башкаруу процессин санарип форматка өткөрүүгө багытталып, арыздарды кабыл алуу, текшерүү жана бөлүштүрүү жол-жоболорун автоматташтырат. Анын жардамы менен министрликтин ишинин ачыктыгы жана натыйжалуулугу жогорулап, жеткирүүчүлөр менен мамлекеттик органдардын ортосунда бирдиктүү санариптик өз ара аракеттенүү мейкиндиги түзүлөт.
Система аркылуу жеткирүүчүлөр quota.agro.gov.kg порталына онлайн катталып, тарифтик квоталарга электрондук арыз бере алышат, арыздардын жүрүшүн көзөмөлдөп, электрондук почта аркылуу билдирмелерди алып турушат. Ошондой эле компаниялар боюнча маалыматтар тиешелүү мамлекеттик базалар аркылуу автоматтык текшерүүдөн өтүп, тарифтик квоталар белгиленген тартипте бөлүштүрүлөт.
Жаңы автоматташтырылган маалыматтык системаны киргизүү тарифтик квоталарды бөлүштүрүүдө кагазсыз документке өтүүгө, адам факторунун таасирин азайтууга жана чечим кабыл алуу процессин ачык жүргүзүүгө шарт түзөт. Натыйжада арыздарды кароо мөөнөттөрү кыскарып, квоталоо системасына бизнес коомчулугунун ишеними артат.
