Кыргызстанда пенсия дайындоонун санариптик системасы ишке киргизилет
Кыргызстанда пенсия дайындоонун санариптик системасын ишке киргизүү пландалып жатканын Жогорку Кеңештин депутаттарына Социалдык фонддун төрагасы Бактияр Алиев билдирди.
Анын айтымында, жаңы система 2026-жылдын 1-июлуна чейин ишке кириши керек. Бул система жарандарды Социалдык фондго милдеттүү түрдө баруудан бошотот, анткени пенсия мурда санариптештирилген маалыматтардын негизинде автоматтык (проактивдүү) түрдө дайындалат.
Бактияр Алиев ошондой эле пенсияны текшерүү, пенсия төлөө, жекелештирилген эсепке алуу жана Социалдык фондунун кирешелерин эсепке алуу кызматтары буга чейин эле санариптештирилгенин кошумчалады.
"Бүгүнкү күндө пенсия төлөө процесси толугу менен санарип форматка өттү", — деди ал. Анын айтымында, бардык кызматтарды "Жеке кабинет" аркылуу алууга болот.
Учурда өлкөдө болжол менен 800 миңге жакын пенсионер бар. Пенсияны санариптик негизде дайындоого өтүү бюрократияны кыскартып, эсептөөлөрдө кетиши мүмкүн болгон каталардын тобокелдигин азайтат.
