Быйыл "Кыргызкөмүр" 1 млн 350 миң тонна көмүр өндүрүп, план 115%га аткарды
2025-жылы "Кыргызкөмүр" ишканасы көмүр тармагындагы позициясын бекемдеп, өндүрүштүк көрсөткүчтөрдү ийгиликтүү жогорулатты. Жыл жыйынтыгы менен Кара-Кече кенинде жана башка участоктордо көмүр казып алуу пландан ашыкча аткарылып, жалпы өндүрүш көлөмү 1 млн 350 миң тоннага жетти. Бул пландык көрсөткүчтөрдүн 115%ын түзөт.
Өндүрүштүн туруктуу жүрүшү Бишкек ЖЭБин жана өлкө калкын көмүр менен үзгүлтүксүз камсыздоого шарт түздү. Күз-кыш мезгилине карата көмүр жеткирүү бекитилген графикке ылайык өз убагында аткарылды.
2025-жылы ишкананын техникалык базасын чыңдоого өзгөчө көңүл бурулуп, 41 даана заманбап техника сатылып алынды. Ошондой эле Кара-Кече кенинде көмүрдү сорттоо комплекстери ишке киргизилип, көмүрдүн сапаты жогорулатылды.
Мындан тышкары, жыл ичинде Кожо-Келен, Бешбурхан, Сүлүктү талаа–11, Маркай жана Торугарт-1 кендери ишке киргизилип, жаңы участоктордо өндүрүш иштери башталды. Көмүр экспортун жөнгө салуунун алкагында "Кыргызкөмүр" 400 миң тоннадан ашык көмүрдү экспорттоду.
2025-жылы "Кыргызкөмүр" мамлекеттик ишканадан ачык акционердик коомго өтүп, башкаруунун заманбап моделине ылайык туруктуу ишмердүүлүгүн улантууда.
