Чоң-Алайда заманбап мал союучу жай ишке кирди
25-декабрда Чоң-Алай районуна караштуу Дароот-Коргон айылында заманбап талаптарга жооп берген мал союлуучу жайдын салтанаттуу ачылышы болду. Иш-чарага Президент Садыр Жапаров онлайн катышты.
Ачылышка жергиликтүү бийлик өкүлдөрү, ишкерлер, ветеринардык кызматтар, фермерлер жана айыл тургундары катышты. Жаңы объект санитардык-гигиеналык нормаларга толук жооп берип, эт азыктарын коопсуз жана сапаттуу даярдоого багытталган. Мал союу процесси эл аралык стандарттарга ылайык жүргүзүлүп, ветеринардык көзөмөл толук камсыздалат.
Ачылыш аземинде бул жайдын аймактагы мал чарбачылыгын өнүктүрүүгө, фермерлер үчүн ыңгайлуу шарт түзүүгө жана калкты таза, текшерүүдөн өткөн эт азыктары менен камсыздоого чоң салым кошору белгиленди. Жаңы ишканада бир нече туруктуу жумуш орундары түзүлүп, жергиликтүү экономиканын өсүшүнө өбөлгө болот.
Мал союлуучу жай заманбап жабдуулар менен камсыздалып, калдыктарды кайра иштетүү жана айлана-чөйрөгө терс таасирин азайтуу технологиялары колдонулат. Ишкананын жетекчилиги келечекте өндүрүш көлөмүн кеңейтип, этти кайра иштетүү жана таңгактоо кызматтарын да жолго коюу пландарын билдиришти.
