Таш-Көмүрдөгү 5 балык чарбасында мыйзам бузуулар аныкталды
Улуттук коопсуздук мамлекеттик комитетинин катынын негизинде Суу ресурстары, айыл чарба жана кайра иштетүү өнөр жайы министрлигине караштуу Жерди жана сууну көзөмөлдөө боюнча кызматтын Жалал-Абад облусу боюнча аймактык башкармалыгы тарабынан Таш-Көмүр шаарында жайгашкан балык чарбаларында текшерүү иш-чаралары жүргүзүлдү.
Текшерүүнүн жүрүшүндө жалпы 7 балык чарбасы каралып, алардын ичинен 5 чарбада Кыргыз Республикасынын мыйзам талаптарынын бузулушу аныкталды. Тактап айтканда, айрым чарбалар жер тилкелерин өз алдынча мыйзамсыз ээлеп алып, алардын багытын бузуу менен максатсыз пайдаланып келгендиги белгилүү болду.
Аталган фактылар боюнча мыйзам чегинде чара көрүү максатында тиешелүү материалдар укук коргоо органдарына өткөрүлүп берилди.
Белгилей кетсек, бул текшерүү иш-чаралары жер жана суу ресурстарын мыйзамдуу, сарамжалдуу жана максаттуу пайдаланууну камсыздоого багытталган.
