Каракол унаа жолун куруу мөөнөтүн жана ченемдерин бузган жаран кармалды
УКМК төрагасы К.Ташиевдин тапшырмасынын негизинде, КР УКМК тарабынан “Балыкчы - Бөкөнбаев-Каракол” авто жолунун курулушунун үч участогу боюнча “Кыргыз Жол Курулуш” ЖЧКсы тарабынан милдеттенмелердин аткарылышы боюнча текшерүү иштери жүргүзүлдү.
УКМКнын басма сөз кызматынан кабарлагандай, тергөө-оперативдүү иш-чараларынын жүрүшүндө, келишимдин шарттарын аткарбагандыгы, курулуш иштеринин мөөнөттөрүн жана техникалык ченемдерин бузгандыгы үчүн «Кыргыз Жол Курулуш» ЖЧКсынын жана «ИС-Саби Холдинг» ЖЧКсынын негиздөөчүсү КР жаран И.М.И. кармалды.
Билдирүүгө караганда ал Республикалык маанидеги автожолдун өз убагында бүткөрүлбөй калышы боюнча козголгон кылмыш ишинин алкагында, коммерциялык уюмдун кызматкерлеринин кызматтык ыйгарым укуктарынан кыянаттык менен пайдаланууга шектелүүдө.
Шектүү азыркы учурда Каракол шаардык ИИБдин убактылуу кармоочу жайына киргизилди. Учурда тергөө иштери улантылып жатат.
