Мэрия "Тазалык" ишканасына 20 атайын техника тапшырды
Бүгүн Т.Сатылганов атындагы Кыргыз улуттук филармониясында "Тазалык" ишканасынын кызматкерлери үчүн салтанаттуу майрамдык иш-чара уюштурулду. Бул тууралуу муниципалитеттен билдиришти.
Иш-чарага Бишкек шаарынын мэри Айбек Джунушалиев катышып, кызматкерлерге үзүрлүү эмгеги жана борбор калаанын өнүгүшүнө кошкон салымы үчүн ыраазычылык билдирди. Шаар башчысы жаңы жыл менен куттуктап, ишкананын директоруна жаңы адистештирилген техникалардын ачкычтарын тапшырды.
Акыркы эки жылда ишканага 188 даана заманбап техника берилген, анын ичинен 20 даанасы бүгүн тапшырылды. Бул жаңы жабдуулар иш процессин тездетип, кызматтардын сапатын жогорулатууга өбөлгө болот деп белгиленди.
Майрамдык иш-чарага 1 200гө жакын кызматкер жана шаардык жана тармактык кызматтардын өкүлдөрү катышты. Коноктор үчүн концерттик программа уюштурулуп, филармониянын артисттери музыкалык жана вокалдык чыгармаларды аткарышты.
Ошондой эле өзгөчөлөнгөн кызматкерлер ыраазычылык каттар жана ардак грамоталар менен сыйланышты. Иш-чара Көз карандысыз профсоюз менен «Тазалык» ишканасынын биргеликте уюштуруусу менен өткөрүлдү.
