Эс алуу күндөрү медициналык мекемелер күчөтүлгөн режимде иштейт
Саламаттык сактоо министрлиги майрам жана эс алуу күндөрү саламаттык сактоо уюмдарынын иштөө тартиби тууралуу маалымдады. Маалыматка ылайык, 30–31-декабрь күндөрү Кыргызстандын бардык медициналык мекемелерде күчөтүлгөн иш режими камсыздалат.
2026-жылдын 1–9-январы аралыгында саламаттык сактоо уюмдары белгиленген тартипте, нөөмөт уюштуруу менен иштешет. Медициналык мекемелерде шашылыш медициналык жардам сутка бою көрсөтүлөт, өзгөчө дарылоону талап кылган бейтаптарды жаткыруу үчүн керебеттердин резерви түзүлөт. Ошондой эле зарыл болгон дары-дармектердин, медициналык буюмдардын, кан компоненттеринин жана алардын резервдеринин жетиштүүлүгү камсыздалат.
1–9-январь күндөрү үй-бүлөлүк медицина борборлорунда, жалпы дарыгердик практика борборлорунда жана үй-бүлөлүк дарыгерлер топторунда үй-бүлөлүк дарыгердин, үй-бүлөлүк медайымдын жана каттоо бөлүмүнүн нөөмөтү саат 08:00дөн 18:00гө чейин уюштурулат. Процедуралык кабинеттер саат 14:00гө чейин иштейт.
Бишкек жана Ош шаарларында, ошондой эле өлкөнүн аймактарында тез жардам кызматы дем алышсыз, сутка бою үзгүлтүксүз иштейт,- деп айтылат Саламаттык сактоо министрлигинин билдирүүсүндө.
