Өзбекстандан келген канаттуу эти текшерүүдөн өтпөй, артка кайтарылды
Бишкекке Өзбекстандан импорттолгон канаттуулардын эти "ТИ Кант" мамлекеттик ишканасынын убактылуу сактоо кампасындагы ветеринардык көзөмөлдө Евразия экономикалык бирлигинин талаптарына жооп бербегени аныкталды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Продукция "FAYZ PARRANDA" ЖЧКдан Бишкектеги "ТТ.Топ.Трейд" ЖЧКга келген. Лабораториялык изилдөөлөрдө антибиотиктердин курамы жол берилген ченемден ашык экени белгилүү болду. Изилдөөлөр аккредитацияланган лаборатория тарабынан жүргүзүлүп, алынган жыйынтыктардын ишенимдүүлүгү тастыкталды.
Ветеринардык көзөмөлдүн жана Бажы бирлигинин чечимине ылайык, эт 11-декабрдагы ветеринардык сертификаттын негизинде кайтарылды.
Калктын саламаттыгын коргоо максатында импорттук азыкка көзөмөл мындан ары да улантылат, - деп айтылат маалыматта.
