Курамында токсин болушу мүмкүн. "Nestlé" балдар тамагынын айрым партияларын кайра чакыртып алууда

Оорулардын алдын алуу жана мамлекеттик санитардык-эпидемиологиялык көзөмөл департаменти (ОАМСЭКД) "Nestlé" тобуна кирген балдар тамагынын продукциясынын расмий дистрибьютору — "Forester" ЖЧКсынан билдирүү алды.

Ведомствонун маалыматына ылайык, "Nestlé Россия" ЖЧКсынын борбордук кеңсеси балдар үчүн чыгарылган айрым азыктарды ыктыярдуу түрдө кайра чакыртып алуу тууралуу чечим кабыл алган. Тактап айтканда, төмөнкү соода белгилери менен чыгарылган кургак, тез эрий турган сүттүү, кычкыл сүттүү жана лактозасыз аралашмалар кайра чакыртылып жатат:

NAN 1 OPTIPRO

NAN OPTIPRO 2 / NAN 2 Optipro

NAN EXPERTPRO

PRENAN

NAN LACTOSE FREE

Бул кайра чакыртып алуу сактык чарасы катары жүргүзүлүүдө жана "Nestlé" компаниясы дүйнө жүзү боюнча ишке ашырып жаткан ыктыярдуу глобалдык кайра чакыртып алуунун бир бөлүгү болуп саналат.

Мындай чечимдин кабыл алынышына чийки затта (арахидон кычкылы) цереулид токсининин болушу мүмкүн деген тобокелчилик себеп болгон.

Расмий дистрибьютор тарабынан Кыргыз Республикасынын аймагындагы соода түйүндөрүнөн көрсөтүлгөн партияларды алып салуу боюнча иш-чаралар башталды.

Жогоруда айтылгандарга байланыштуу ОАМСЭКД керектөөчүлөргө колдонуп жаткан балдар аралашмасынын аталышын жана чыгарылган датасын текшерүүнү сунуштайт. Эгерде ал кайра чакыртылып жаткан партияларга туура келсе, продукцияны колдонбоо жана кайтарып берүү үчүн расмий дистрибьюторго кайрылуу сунушталат.

Өндүрүүчүнүн маалыматы боюнча, кайра чакыртып алуу цереулид токсини болушу мүмкүн болгон чектелген сандагы партияларга гана тиешелүү.

Цереулид — Bacillus cereus бактериясынын айрым штаммдары бөлүп чыгара турган токсин. Ал жогорку температурага туруктуу болуп, кайнатууда бузулбайт. Цереулиддин жогорку өлчөмү бар продукцияны колдонгондон кийин төмөнкү белгилер пайда болушу мүмкүн:

• кусуу
• ич өтүү

Бул белгилер тамак-аштан ууланууга же уй сүтүнүн белогуна болгон аллергияга окшош болушу мүмкүн.