Кыргызстанда блогерлер тууралуу мыйзам долбоору иштелип чыгат
Кыргызстанда блогерлер тууралуу мыйзам долбоору иштелип жатканын журналисттерге Маданият, маалымат жана жаштар саясаты министри Мирбек Мамбеталиев билдирди.
"Биз “блогер” деген ким экенин так аныкташыбыз керек. Блогерлердин өзүнүн катталуучулары, өз аудиториясы бар жана алар коомго таасир эте алышат. Ооба, алар ЖМК катары каралбайт, бирок кандайдыр бир маалыматты таратып жатып, адамдарга таасир эткендиктен, жоопкерчилик да болушу керек", — деп түшүндүрдү министр.
Ал мисал катары блог жүргүзгөн мамлекеттик кызматкер менен медиа мейкиндиктеги белгилүү инсандарды келтирди.
"Мисалы, мамлекеттик кызматтагы блогер бар, анын 5 миң же 10 миңдей катталуучусу болушу мүмкүн. Ал жөн гана расмий маалыматтарды таратып турат. Ал эми 50–100 миң, айрымдары миллиондон ашык катталуучусу бар блогерлер бар, алар ишкердик менен алектенип, ар кандай товарларды жарнамалашат. Бул дагы ишкерлик болуп эсептелет. Ошондуктан биз азыр бул тармакты так аныктап, баарына ылайыктуу, адилеттүү чечим кабыл алышыбыз керек", — деди министр.
Анын айтымында, блогерлер тууралуу мыйзам долбоору 2026-жылдын ичинде даяр болот.
