Бакыт Төрөбаев 2024-жылы канча киреше тапкан?
Министрлер кабинетинин төрагасынын орун басары — суу ресурстары, айыл чарба жана кайра иштетүү өнөр жайы министри Бакыт Торобаев 2024-жылы өткөн жылга салыштырмалуу азыраак киреше тапкан. Кыргызстандын Салык кызматы аткаминерлердин отчеттук мезгил үчүн декларациялык маалыматтарын жарыялай баштады.
Декларацияга ылайык, Бакыт Төрөбаевдин 2024-жылдагы кирешеси 1 миллион 811,9 миң сомду түзгөн. Ошол эле учурда ал бир да тыйын короткон эмес — чыгаша бөлүмүндө нөл деп көрсөтүлгөн.
Анын менчигинде төмөнкүлөр бар:
- жалпы аянты 179 чарчы метр болгон турак үй;
- жалпы аянты 180 чарчы метр болгон турак үй;
- айыл чарба багытындагы жер тилкеси — 1 миң 430 чарчы метр;
- айыл чарба багытындагы жер тилкеси — 40 чарчы метр;
- айыл чарбага тиешеси жок жер тилкелери — 100 чарчы метр.
Жакын туугандарынын кирешеси жана мүлкү тууралуу маалыматта:
- аянты 385 чарчы метр болгон турак үй;
- жалпы аянты 57,63 чарчы метр болгон батир;
- айыл чарбага тиешеси жок, аянты 3 миң 500 чарчы метр болгон жер тилкеси көрсөтүлгөн.
Үй-бүлөнүн автоунаасы жок.
Белгилей кетсек, Бакыт Торобаевдин 2023-жылга карата декларациясында жер тилкелери тууралуу маалымат болгон эмес.
