Бишкекте лазер жарыгы бар жол чырактар орнотулду
Бишкек шаарындагы Курманжан Датка жана Фрунзе көчөлөрүнүн кесилишине лазер жарыгы күйгөн жаңы жол чырактар орнотулду.
Бул жол чыракты алгачкы жолу “Шаардык жол-транспорттук инфратүзүм” муниципалдык ишканасы өз күчү менен иштеп чыгып, даярдагандыгын, мэриянын басма сөз кызматынан кабарлашты. Билдирүүгө караганда, мындай жарык аба ырайы ыңгайсыз болгон учурда, туман каптаганда же жаан-чачын болгондо жөө жүргүнчүлөрдүн айдоочуларга жакшыраак көрүнүшүнө жардам берет.
Ошондой эле жол кырсыктарын алдын алууга жана жол кыймылынын коопсуздугун камсыздоого түздөн-түз өбөлгө түзөт.
Аталган долбоордун ишке ашырылышы муниципалдык ишкананын техникалык мүмкүнчүлүктөрүн көрсөтүп, шаардык жол-транспорттук инфраструктурага заманбап чечимдерди киргизүүгө, ошондой эле жол кырсыктарынын санын кыскартууга багытталган.
