Россияда медициналык кароодон качкан мигранттарга айып пул салуу каралып жатат
Россия Федерациясы милдеттүү медициналык кароодон өтүүдөн баш тарткан эмгек мигранттарын жоопкерчиликке тартууну пландап жатканын Мамлекеттик думанын төрагасы Вячеслав Володин билдирди.
Россияга үч айдан ашык мөөнөткө келген чет өлкөлүк жарандар үчүн медициналык кароодон өтүү мөөнөтү 90 күндөн 30 күнгө чейин кыскартылат. Медициналык мекемелер кароонун жыйынтыктарын Россиянын ИИМине тапшырууга милдеттүү болот, ал эми жугуштуу оорулар аныкталган учурда маалыматтар Керектөөчүлөрдүн укуктарын коргоо жана адамдын бакубаттуулугу жаатындагы федералдык көзөмөл кызматына жөнөтүлөт.
Бул чаралар мыйзам бузуулар аныкталган учурда мигранттарды ыкчам депортациялоо максатын көздөйт.
Медициналык кароодон өтүүдөн качкан мигранттар үчүн административдик жоопкерчилик киргизүү да каралып жатканы маалым болду. Бул айып пул салуу жана соттун чечими менен өлкөдөн чыгаруу (депортациялоо) чараларын камтыйт.
Ал эми мигранттардын ден соолугунун абалы тууралуу жасалма документтерди даярдоо же колдонуу кылмыш иши катары каралат.
"Бул чаралар мигранттарга көзөмөлдү күчөтүүгө жана коомдук коопсуздукту жогорулатууга багытталган", — деп белгиледи Вячеслав Володин.
