Былтыр 25,5 млн баш мал ветеринардык көзөмөлдөн өткөрүлгөн
2025-жылы республика боюнча 25 миллион 546 миң баш мал-жандыкка ветеринардык иш-чаралар жүргүзүлдү. Бул тууралуу Суу ресурстары, айыл чарба жана кайра иштетүү өнөр жайы министрлигине караштуу Ветеринария, мал чарбасын өнүктүрүү, жайыт жана тоют кызматынын директорунун орун басары Бакыт Шарапов "Биринчи радиого" берген маегинде билдирди.
Анын айтымында, жүргүзүлгөн иштердин ичинен 23 миллион 537 миң эмдөө, 12 миллион 17 миң диагностикалык изилдөө жана 738 миң баш малга мите курттарга каршы дарылоо камтылган. Белгиленген план 104 % аткарылган.
Ошондой эле жугуштуу оорулардын алдын алуу максатында мал базарларда жана мал союучу жайларда ветеринардык көзөмөл күчөтүлгөн. Малдар ветеринарлар тарабынан текшерилип, эт сатууда кардарлар ветеринардык көзөмөлдөн өткөндүгүн тастыктаган сертификатты талап кылууга укуктуу экени белгиленди.
