Бишкекте "Тазалык" ишканасынын жаңы өндүрүштүк базасы курула баштады
Бүгүн Бишкек шаарынын мэри Айбек Джунушалиев "Тазалык" муниципалдык ишканасынын жаңы өндүрүштүк базасынын пайдубалына капсула салды. Курулуш 2026-жылдын жай айларына чейин толук бүтүрүлөт. Бул тууралуу муниципалитеттен билдиришти.
Мэр кызматкерлердин борбор калаанын тазалыгын он жыл бою камсыздап келе жатканына ыраазычылыгын билдирди жана заманбап базанын эмгекти жеңилдетерин, коопсуздукту жана кызматтардын сапатын жогорулатарын белгиледи.
Жаңы база 4,13 гектар аянтты ээлеп, 11 500 чарчы метр имараттарды камтыйт. Анда өндүрүштүк жана оңдоо цехтери, техникалар үчүн ангарлар, таштандыларды жүктөө станциялары, ошондой эле кызматкерлер үчүн социалдык жана спорттук объекттер жайгашат.
2025-жылы ишкана 62 даана жаңы техника сатып алып, автопаркты жаңылады, кызмат көрсөтүүлөрдүн камтылышы 1 млн 41 миңден ашуун адамга жетти. Ошондой эле шаарда таштандыларды сорттоочу пункттардын курулушу башталды, бул экологияны жакшыртууга багытталган маанилүү кадам болуп саналат.
