Эмгек министрлиги социалдык жардам жана жумуш мүмкүнчүлүктөрүн талкуулады
Эмгек, социалдык камсыздоо жана миграция министрлигинде биринчи орун басар министр К.С. Досматов жана Дүйнөлүк банктын өкүлдөрүнүн катышуусунда жумушчу кеңешме өттү. Бул тууралуу ведомствонун маалымат кызматынан билдиришти.
Жолугушуунун жүрүшүндө тараптар "Социалдык жардам программаларын жана эмгек рыногун чыңдоо" аттуу биргелешкен долбоордун ишке ашырылышынын жүрүшүн талкуулашты. Өзгөчө көңүл "Үй-бүлөгө көмөк" социалдык колдоо программасынын натыйжалуулугун жогорулатууга жана жаш жарандардын жумуш менен камсыз болуусуна багытталган "Жаштар стажировкалары" программасын ишке ашырууга бурулду.
Бүгүнкү күндө долбоор боюнча каржылык өздөштүрүү 64%ды түзүп, пландаштырылган иш-чаралардын ийгиликтүү аткарылып жатканын көрсөтүүдө. Ошондой эле 2025-жылдын июль айында долбоорду реструктуризациялоо боюнча чечим кабыл алынып, анын ишке ашыруу мөөнөтү 2027-жылдын апрель айына чейин узартылган.
Талкуунун жыйынтыгында тараптар долбоорду мындан ары да натыйжалуу ишке ашырууга, ошондой эле өлкөдө социалдык колдоо чараларын жана эмгек рыногун өнүктүрүүнү күчөтүүгө багытталган бир катар макулдашууларга жетишти.
