Токмоктогу "Космос" кинотеатры 1 млн 550 миң долларга модернизацияланды
Токмок шаарында оңдоп-түзөөдөн өткөн “Космос” кинотеатрынын салтанаттуу ачылышы болду. Бул тууралуу Россия-Кыргыз өнүктүрүү фондунан (РКӨФ) билдиришти.
Долбоордун алкагында РКӨФ 1 млн 550 миң АКШ долларын бөлүп берген. Бул каражат Кыргызстандын кичи жана орто шаарларындагы — Баткен, Чолпон-Ата, Кербен, Араван, Беловодск жана Токмок шаарларындагы алты кинотеатрды реконструкциялоого багытталган.
Кинотеатр 1973-жылы курулуп, көп жылдар бою иштебей турган. Реконструкциянын натыйжасында 400 орундуу зал капиталдык оңдоодон өтүп, заманбап санариптик жабдуулар жана ыңгайлуу эмеректер менен камсыздалды.
Долбоор шаар тургундары үчүн жаңы маданий мейкиндик түзүп, 200дөн ашык жаңы жумуш ордун түзүүгө шарт түзөт. Мындан тышкары, алыскы райондордун тургундары заманбап кинолорду, анын ичинде ата мекендик тасмаларды көрүүгө мүмкүнчүлүк алышат.
“Токмоктогу кинотеатр — бул Кыргызстан боюнча бирдиктүү маданий мейкиндикти түзүү боюнча системалык иштин бир бөлүгү,” — деп белгиледи РКӨФ башкармалыгынын төрагасы Артем Новиков.
