Жаңы Ош базары жана Батыш автобекети качан бүтөрү белгилүү болду
Министрлер Кабинетинин Төрагасы Адылбек Касымалиев бүгүн Бишкекте курулуп жаткан стратегиялык объекттер менен таанышып, транспорттук, соода-сатык жана спорттук инфратүзүмдү өнүктүрүү боюнча иштерди көзөмөлдөдү. Бул тууралуу Өкмөттүн басма сөз кызматынан билдиришти.
Төрага Батыш автобекетинин курулушу жана жол тармактарынын абалы менен таанышып, борбордогу унаа тыгындарын азайтуу үчүн жалпы узундугу 8,74 км болгон жолдордун долбоору тууралуу маалымат алды. Бул долбоор Профсоюз көчөсүн Түндүк айланма жол менен байланыштырган негизги тилкени жана эки кошумча бириктирүүчү жолду камтыйт.
Андан соң Адылбек Касымалиев жаңы Ош базарынын курулушу менен таанышып, соода борборуна заманбап кампалар жана кенен автоунаа токтотуучу жайлар курулушун тапшырды. Президенттин аппаратынын башкаруучусу Каныбек Туманбаев курулуш иштеринин графикке ылайык жүрүп жатканын, май айына чейин бүтүрүү пландалып жатканын билдирди.
