Мамлекеттик салык кызматынын мурдагы жетекчилери мамлекетке 4 млрд 307 млн сом кайтарышты
УКМК Бишкек шаарынын Ленин райондук соту тарабынан Мамлекеттик салык кызматынын мурдагы төрагасы Алтынбек Абдуваповго жана анын орун басары Исламбек Кыдыргычовго карата чыгарылган айыптоо өкүмүнө комментарий берди.
УКМКнын маалыматына ылайык, аталган адамдар 2024-жылдын 6-декабрында Кыргыз Республикасынын Кылмыш-жаза кодексинин 337-беренесинин 3-бөлүгү ("Кызмат абалынан кыянаттык менен пайдалануу") боюнча козголгон кылмыш ишинин алкагында кармалган.
Тергөөнүн жүрүшүндө бардык фигуранттар күнөөсүн толугу менен мойнуна алып, мамлекетке келтирилген зыянды 4 млрд 307 млн сом өлчөмүндө толук кайтарып беришкен.
УКМК белгилегендей, тергөө иштеринин жыйынтыктары 2025-жылы салык жана камсыздандыруу төгүмдөрүн жыйноо боюнча планды толук аткарууга өбөлгө түзүп, бюджетке кошумча 40 млрд сомдун түшүшүн камсыздаган.
Иштин башка фигуранттарына карата тергөө улантылууда. Анын жыйынтыктары жана көрүлгөн чаралар тууралуу коомчулукка кошумча маалымат берилет.
Эске салсак, соттун өкүмүнө ылайык, Алтынбек Абдувапов 400 миң сом, Исламбек Кыдыргычов 300 миң сом өлчөмүндө айып пул төлөөгө милдеттендирилди. Ошондой эле экөө тең белгилүү кызматтарды ээлөө укугунан, класстык наамдарынан жана мамлекеттик сыйлыктарынан ажыратылды.
