Өткөн жылы фитосанитардык талаптарды бузган 35 учур аныкталган
Өсүмдүктөрдү химиялаштыруу, коргоо жана карантин департаменти тарабынан 2025-жылдын 12 айынын жыйынтыгы боюнча фитосанитардык талаптарга жооп бербеген 35 фитосанитардык талаптарды бузуу фактылары катталган. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Аталган фактылар боюнча жалпысынан 562,5 тонна продукция, анын ичинде 70 515 даана көчөт, 11 387 даана гүл, ошондой эле 136 м³ пиломатериалдар фитосанитардык талаптарга жооп бербегени аныкталган.
Анын ичинде:
- Казакстандан келген – 15 факты, 271,88 тонна;
- Россиядан келген – 5 факты, 117 тонна, 136 м³ пиломатериалдар;
- Өзбекстандан келген – 7 факты, 80,82 тонна, 70 515 даана көчөт;
- Кытайдан келген – 4 факты, 51,28 тонна, 8 050 даана гүл;
- Тажикстандан келген – 1 факты, 3,5 тонна;
- АКШдан келген – 1 факты, 18 тонна;
- Монголиядан келген – 1 факты, 20 тонна;
- Нидерландыдан келген – 1 факты, 3 337 даана гүл.
Фитосанитардык талаптарды бузган товарларга карата кайтаруу, жок кылуу же зыянсыздандыруу боюнча тиешелүү фитосанитардык чаралар көрүлгөн.
Ошондой эле, Кытай жана Нидерланды мамлекеттерине дипломатиялык каналдар аркылуу нота жөнөтүлгөн.
