Билим берүү уюмдарында студенттерден айып пул өндүрүү практикасын токтотуу сунушталууда
КРнын Илим, жогорку билим берүү жана инновациялар министрлиги КРнын жогорку жана орто кесиптик билим берүү уюмдарына, менчик формасына карабастан, окуу сабактарын жана өндүрүштүк практиканы калтыргандыгы үчүн студенттерден акчалай айып пул өндүрүү практикасын токтотуу сунушун билдирүүдө.
Бул сунуш билим алуучулардын укуктарын камсыз кылуу, окуу тартибине карата адилеттүү жана бирдиктүү мамилелерди калыптандыруу, ошондой эле билим берүү чөйрөсүндө негизсиз каржылык жаза колдонууга жол бербөө максатында демилгеленди.
Министрлик колдонуудагы мыйзамдарга ылайык, акчалай санкцияларга байланышпаган академиялык мүнөздөгү альтернативдүү чараларды колдонууну сунуштайт.
Бул максатты ишке ашыруунун алкагында Министрлик жогорку жана орто кесиптик билим берүү уюмдарынын ишмердүүлүгүн жөнгө салуучу тиешелүү ченемдик-укуктук актыларга өзгөртүүлөрдү киргизүү боюнча ишти демилгелемекчи.
