Кыргызстан VI Дүйнөлүк көчмөндөр оюндарына кызуу даярдык көрүүдө
Бүгүн, 15-январда “Кабар” улуттук маалымат агенттигинде VI Дүйнөлүк көчмөндөр оюндарына арналган расмий маалымат жыйыны болуп өттү. Ага КРнын Министрлер Кабинетине караштуу Дене тарбия жана спорт мамлекеттик агенттигинин директору Казыбек Молдажиев катышты.
Ишчаранын жүрүшүндө К.Молдажиев Дүйнөлүк көчмөндөр оюндарынын спорттук программасы менен тааныштырып, даярдык иштеринин учурдагы жүрүшү тууралуу маалымат берди.
Билдирүүгө караганда, VI Дүйнөлүк көчмөндөр оюндарына даярдык көрүү иштери пландуу негизде жүргүзүлүп, иш-чараны жогорку деңгээлде өткөрүүгө, көчмөндөрдүн салттуу баалуулуктарын сактоого жана эл аралык стандарттарга шайкештигин камсыздоого өзгөчө көңүл бурулууда.
Эске салсак, VI Дүйнөлүк көчмөндөр оюндары 2026-жылдын 31-августунан 6-сентябрына чейин Кыргыз Республикасында өтөт. Ачылыш аземи Бишкек шаарында өтүп, негизги мелдештер, анын ичинде жабылуу аземи, Ысык-Көлдүн жээгинде өткөрүлөт. Бул ири эл аралык иш-чарага салттуу спорт түрлөрү боюнча күч сынашуу үчүн дүйнөнүн ондогон өлкөлөрүнөн спортчулар катышат.
