Apple жана Google’дан X соцтармагын жана Grok нейротармагын алып салууну 28 уюм талап кылышты
Санариптик укуктарды, аялдардын жана балдардын укуктарын коргоо тармагында иш алып барган 28 уюмдан турган коалиция Apple жана Google корпорацияларына кайрылып, X социалдык тармагын жана Grok чат-ботун App Store жана Google Play колдонмо дүкөндөрүнөн алып салууну талап кылды.
Reuters агенттиги билдиргендей, кайрылууга авторлордун пикиринде платформалардын эрежелерин бузган ачык мүнөздөгү дипфейк сүрөттөрүн жаратуу мүмкүнчүлүгү себеп болгон.
Ачык каттар Apple компаниясынын башкы директору Тим Кукка жана Google’дун жетекчиси Сундар Пичаига жөнөтүлгөн. Анда X жана Grok’тун функционалы сексуалдашкан жана кемсинтүүчү сүрөттөрдү, анын ичинде аялдардын жана жашы жете электердин образдарын колдонуу менен түзүүгө шарт түзөрү жана бул колдонмолорду жайгаштыруу эрежелерине каршы келери айтылган.
Apple, Google жана X компаниялары Reuters агенттигинин суроо-талаптарына жооп беришкен жок. Ал эми Grok’ту иштеп чыккан Илон Масктын xAI компаниясы "салттуу ММКлар" тарабынан айтылган айыптоолор чындыкка дал келбейт деп билдирди.
Эске салсак, 2025-жылдын декабрында xAI Grok’тогу сүрөттөрдү түзөтүү мүмкүнчүлүктөрүн кеңейткен, ал эми X ошол эле модель негизинде сүрөттөр менен иштөө үчүн акысыз ИИ-куралды ишке киргизген. 2026-жылдын январь айынын башында бир нече өлкөнүн жөнгө салуучу органдары колдонуучулардын адепсиз жана кемсинтүүчү сүрөттөрдүн түзүлүшүнө байланыштуу даттанууларынан кийин X’ти кошумча чараларды көрүүгө чакырышкан. Андан соң Индонезия менен Малайзия Grok’ко жеткиликтүүлүктү чектеп, Улуу Британиянын жөнгө салуучу органы X боюнча иликтөө баштаган.
