Бишкек базарларында уй жана кой этинин баалары көзөмөлдөнүүдө
Бишкек шаарында калкка зарыл азык-түлүк, анын ичинде уй жана кой этине бааларга туруктуу мониторинг жүргүзүлүүдө. Бул чара 2025-жылдын 7-августундагы №140 буйругуна ылайык, сөөктүү уй жана кой этинин бааларын убактылуу мамлекеттик жөнгө салуу максатында өткөрүлүүдө.
Муниципалитеттен билдиргендей, Свердлов, Биринчи Май, Ленин жана Октябрь райондук администрациялары Антимонополиялык жөнгө салуу кызматы, ветеринардык жана салык органдары менен биргеликте базарларда жана соода түйүндөрүндө рейддик текшерүүлөрдү жүргүзүүдө. Өзгөчө көңүл уй жана кой этинин баасы бир килограммы үчүн 680 сомдон ашпоого бурулууда.
Ошондой эле калкка ыңгайлуу баада эт сатуу максатында ортомчусуз соода пункттары уюштурулуп, жаңы "Чүйгүн" эт павильону ишке киргизилди. Учурда дүң баалар: кой эти — 640-680 сом, уй эти — 640-680 сом, жылкы эти — 540-560 сом, чекене баалар 660 сомдон башталат.
Рейддик иш-чаралар жана эт бааларына көзөмөл туруктуу негизде улантылат.
