Бишкекте экологиялык талаптарды бузган ишкерге 28 миң сом айып салынды
Күн мурун социалдык тармактарда Бишкек шаарынын Свердлов районуна караштуу Огонбаева — Алма-Атинская көчөлөрүнүн кесилишинде жайгашкан объекттен кара түтүн чыгып жатканы тууралуу маалымат тараган.
Бул билдирүүгө Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын инспекторлору дароо реакция жасап, тиешелүү текшерүү иштерин жүргүзүштү.
Текшерүүнүн жыйынтыгында түтүн "Авангард 2" мейманканасына тиешелүү экени аныкталды. Ишкер С.Г.Вга Кыргыз Республикасынын Укук бузуу жөнүндө Кодексинин 230-беренесине ылайык 28 миң сом өлчөмүндө айып салынды.
Мындан тышкары, ишкерге жаратылышты коргоо мыйзамдарынын нормаларын, эрежелерин жана талаптарын сактоо боюнча түшүндүрүү иштери жүргүзүлдү.
Экологиялык жана техникалык көзөмөл кызматы жарандардын кайрылууларына жана ачык маалымат булактарындагы билдирүүлөргө ыкчам чара көрүүнү улантууда.
