Д.Трамп Гренландия боюнча позициясы үчүн Европанын 8 мамлекетине 10%дык бажы салыгын киргизерин эскертти
АКШнын президенти Дональд Трамп АКШнын Гренландияны көзөмөлгө алуу аракетине каршы чыккан сегиз европалык өлкөгө 10%дык бажы төлөмдөрү киргизилерин билдиргенин The Guardian басылмасы жазды.
АКШ лидери билдиргендей, 1-февралдан тарта Дания, Норвегия, Швеция, Улуу Британия, Франция, Германия, Нидерланддар жана Финляндиядан АКШга экспорттолгон бардык товарларга 10% бажы төлөмү колдонулат. Ошондой эле Трамп 1-июндан тарта бул тариф 25%га чейин жогорулай турганын айтты.
"Биз көп жылдар бою Данияны, Европа Биримдигинин бардык өлкөлөрүн жана башка мамлекеттерди бажы төлөмдөрүн же башка компенсацияларды албай эле субсидиялап келдик. Эми, кылымдар өткөндөн кийин, Дания жакшылыкка жакшылык менен жооп бере турган убак келди — дүйнөлүк тынчтык таразада турат!" — деп жазды Трамп Truth Social социалдык тармагында.
Ал ошондой эле бажы төлөмдөр Гренландияны толук жана сөзсүз сатып алуу боюнча макулдашууга жетишилгенге чейин алынарын белгиледи.
Трамп мурдагыдай эле "Кытай менен Россия Гренландияны алууну каалап жатат" деген эскертүүсүн кайталап, "Дания муну менен эч нерсе кыла албайт" деп баса белгиледи.
