Кыргызстанда 150 миң жаранга ПИН ката менен берилген
Кыргызстанда болжол менен 150 миң жаранга персоналдык идентификациялык номер (ПИН) ката менен берилгенин мамлекеттик "Кызмат" мекемесинин директорунун орун басары Эрнес Досалиев Жогорку Кеңештин илим, билим берүү, инновациялык өнүгүү, маалыматтык технологиялар, маданият, спорт жана жаштар иштери боюнча комитетинин жыйынында билдирди.
Комитеттин жыйынында Кыргыз Республикасынын жарандарын милдеттүү мамлекеттик социалдык камсыздандыруу максатында персонификацияланган (жеке) эсепке алуу тууралуу мыйзам долбоору каралды. Бул документ ПИНди ыйгаруу жана аны оңдоо тартибин Министрлер Кабинети аркылуу тактоого багытталган.
Жыйында депутат Гүлшаркан Култаева ПИН өзгөртүлгөн учурда анын тарыхы кандайча сакталары, башкача айтканда, жаран номерин алмаштыргандан кийин да ошол номер менен ишин уланта алышы жана бул жагдай мыйзамда так жазылышы керектиги тууралуу суроо койду.
Эрнес Досалиев ПИН — бул жаранды идентификациялоочу курал экенин белгиледи. Анын айтымында, система ичинде бардык маалыматтар катталган жана аларды толугу менен жокко чыгарууга же өчүрүүгө мүмкүн эмес. Ал ошондой эле буга чейин Кыргызстанда 150 миңге жакын жаран ПИНди ката менен алганын, мында жарандардын эч кандай күнөөсү жок экенин айтты. ПИНди өзгөртүү жаран өзү арыз берген учурда гана жүргүзүлөт.
Депутаттын айтымында, жарандар ПИН алмаштырганда ар кандай көйгөйлөргө туш болбошу үчүн бардык маалыматтар бирдиктүү система аркылуу интеграцияланышы керек.
