Кыргызстан Россиядан санарип ветеринардык көзөмөл боюнча тажрыйба алды
Москва шаарында Суу ресурстары, айыл чарба жана кайра иштетүү өнөр жайы министрлигинин өкүлдөрү Россия Федерациясынын Ветеринардык жана фитосанитардык көзөмөл боюнча федералдык кызматы — Россельхознадзор менен жумушчу жолугушуу өткөрүштү. Бул тууралуу Айыл чарба министрлигинен билдиришти.
Кыргыз делегациясын министрдин орун басары Асель Кененбаева, ал эми Россия тараптан Россельхознадзордун жетекчисинин орун басары Константин Савенков жетектеди.
Жолугушуунун негизги максаты — ветеринардык жана фитосанитардык көзөмөлдө колдонулуп жаткан санариптик маалыматтык системалардын мүмкүнчүлүктөрү менен таанышуу болду. Айрыкча ФГИС "ВетИС" системасына, ошондой эле ветеринардык жана фитосанитардык сертификаттарды электрондук тариздөө тажрыйбасына өзгөчө көңүл бурулду.
Визиттин алкагында Россиянын мамлекеттик көзөмөлдү санариптештирүү боюнча тажрыйбасы изилденип, алынган билимдерди Кыргызстанда улуттук санариптик чечимдерди иштеп чыгууда жана киргизүүдө колдонуу пландалууда.
Мындан тышкары, кыргызстандык адистер Россельхознадзорго караштуу мекемелерде практикалык таанышуу иш-чараларын улантып, ветеринардык жана фитосанитардык көзөмөл тармагындагы бирдиктүү маалыматтык системалардын иши менен жеринде таанышышат.
