Ошто “Асан-Үсөн” бала бакчасынын жаңы имараты пайдаланууга берилди
Кечээ, Ош шаарынын А.Масалиев көчөсүндөгү “Асан-Үсөн” бала бакчасына кошумча курулган 100 орундуу имарат өз эшигин ачты.
Мэриянын маалыматына ылайык, ачылыш аземине шаар мэри Жеңишбек Токторбаев, Агартуу министри Догдургүл Кендирбаева, Президенттин Ош облусундагы ыйгарым укуктуу өкүлү Аманкан Кенжебаев, шаардык кеңештин төрагасы Болот Баетов, бала бакча жамааты жана ата-энелер катышты.
Мэр Жеңишбек Токторбаев ачылышта шаар тургундарына маалымдагандай, 2025-жылы Ош шаарына республикалык бюджеттен мектептер жана бала бакчалар үчүн 1 млрд 300 млн сом бөлүнгөн. Ал кошумчалады, жаңы имарат эскилиги жетип, оор шартта иштеп келген бала бакчанын билим берүү сапатын жакшыртат.
Жаңы 100 орундуу имарат заманбап класстар, оюн аянтчалары жана коопсуз инфратүзүм менен камсыздалган. Эски имарат да толук оңдоп-түзөөдөн өткөрүлүп, терезелери алмаштырылды, фасады оңдолду, балдар үчүн беседкалар жана отургучтар орнотулду.
