Айыл чарба министри фермерлер менен салык маселесин талкуулады
Бүгүн Суу ресурстары, айыл чарба жана кайра иштетүү өнөр жайы министри Бакыт Эргешович Төрөбаев фермерлерди жеке кабыл алды. Жарандар кабыл алууга алдын ала катталып, бекитилген графикке ылайык келишкен. Бул тууралуу ведомстводон билдиришти.
Жолугушууга министрдин орун басарлары, өлкөнүн ар кайсы аймактарынан келген фермерлер жана Мамлекеттик салык кызматынын өкүлдөрү катышты. Кабыл алуу учурунда фермерлер салык маселелери боюнча кайрылып, айрым эсептөөлөрдө көйгөйлөр бар экенин белгилешти жана мыйзам чегинде жеңилдиктерди карап чыгуу сунушун беришти.
Министр Бакыт Төрөбаев фермерлердин кайрылууларын угуп, Мамлекеттик салык кызматына маселелерди терең изилдеп чыгуу жана тиешелүү сунуштарды даярдоо тапшырмасын берди.
Ал ошондой эле айыл чарба өндүрүүчүлөрүн колдоо мамлекеттик саясаттын артыкчылыктуу багыттарынын бири экенин белгилеп, тоскоолдуктарды жоюу боюнча иштер улантыларын айтты.
