Таласта мыйзамсыз жер бөлүштүрүү боюнча шектүү кармалды
УКМК Талас облусунда жер тилкелерин мыйзамсыз бөлүштүрүү боюнча коррупциялык схеманы аныктады. Бул иш боюнча аймактык Жер ресурстары, кадастр, геодезия жана картография мамлекеттик агенттигинин райондук филиалынын адиси кармалганын Улуттук коопсуздук мамлекеттик комитетинин басма сөз борбору маалымдады.
Маалыматка ылайык, УКМКнын иликтөөсүндө айыл өкмөтүнүн токтомдорун жасалмалоо жолу менен Талас облусунун Айтматов районундагы Кара-Буура айыл өкмөтүнүн аймагында 43 жаранга жалпы аянты 10,75 гектарды түзгөн жер тилкелери мыйзамсыз бөлүнүп берилгени аныкталган.
Оперативдик маалыматтарга ылайык, ушул эле ыкма менен жалпы жонунан 56 жер тилкеси мыйзамсыз берилген.
Ведомствонун маалыматына караганда, Министрлер Кабинетине караштуу Жер ресурстары, кадастр, геодезия жана картография мамлекеттик агенттигинин Айтматов райондук филиалынын адиси Э. А. Т. текшерүүнү токтотуу жана жоопкерчиликтен качуу максатында пара берүүгө аракет кылган.
Маалыматка ылайык, Э. А. Т. 20-январда козголгон кылмыш ишинин алкагында УКМК кызматкерине 100 миң сом пара берээрде кармалган.
