Ысык-Көлдө чатыры ураган мектеп боюнча Курулуш министрлигинин түшүндүрмөсү
Ысык-Көл облусунун Түп районуна караштуу Миң-Булак айылындагы 150 орундуу Ислам Касмалиев атындагы мектептин чатыры 18-январда калың кардын кесепетинен урап түшкөн. Бул боюнча Курулуш, архитектура жана турак жай-коммуналдык чарба министрлиги түшүндүрмө берди.
Мектеп пайдаланууга берилген эмес, себеби чатыр орнотуу Мамлекеттик архитектура-курулуш контролдоо департаменти тарабынан кабыл алынган эмес. Курулуш “Ас-Салам” фонду тарабынан каржыланып, “Энержи-Нур строй” ЖЧКсы аткарган.
Чатыры урап түшкөндөн кийин компанияга жазуу түрүндө эскертүү берилди, чатыр толук калыбына келтирилди жана 200 миң сом айып салынды. Лицензиясын токтотуу маселеси комиссиянын отурумунда каралат.
Алдыда жаңы мектепти кабыл алуу боюнча тиешелүү органдар тарабынан текшерүү жүргүзүлүп, оң корутунду берилгенден кийин гана Ысык-Көл регионалдык архитектура-курулуш контролдоо башкармалыгы тарабынан объект расмий пайдаланууга берилет, — деп билдирет министрлик.
