Алайда прокуратуранын жаңы имараты пайдаланууга берилди
Ош облусунун Алай районунда прокуратура органдарынын ишмердүүлүгүн жакшыртууга багытталган жаңы административдик имарат пайдаланууга берилди. Бул тууралуу Башкы прокуратурадан билдиришти.
Маалыматка ылайык, жаңы имараттын ачылыш аземине Башкы прокурор Асаналиев Максат Кубатович катышты. Ал өз сөзүндө мыйзамдуулукту камсыз кылууда жана жарандардын укуктарын коргоодо райондук прокуратуранын кызматкерлеринин ишмердүүлүгүн арттырууга толук шарттар түзүлгөнүн белгиледи. Башкы прокурордун айтымында, жаңы имарат кызматтык милдеттерди татыктуу аткарууга кошумча дем берет.
Белгилей кетсек, Алай районунун прокуратурасынын кызматкерлери буга чейин 1968-жылы курулган, эскилиги жеткен имаратта иштеп келишкен. Жаңы имарат кыска мөөнөттө толугу менен курулуп, кызматкерлер заманбап жана бардык зарыл шарттар менен камсыздалды.
Учурда өлкө жетекчилиги тарабынан прокуратура органдарынын материалдык-техникалык базасын чыңдоого өзгөчө көңүл бурулуп, көзөмөлдүк ишмердүүлүктүн жана жарандарга көрсөтүлүүчү кызматтардын сапатын жогорулатуу максатында бир катар кызматтык объекттердин курулушу ишке ашырылууда.
