Кыргызстан хоккей боюнча дүйнө чемпионатында (U-20) төртүнчү ирет жеңишке жетти

Кыргызстандын хоккей боюнча жаштар курама командасы үчүнчү дивизиондун (В тайпасы) командалары арасындагы дүйнө чемпионатында ийгиликтүү оюнун улантууда. Дене тарбия жана спорт мамлекеттик агенттигинен маалымдагандай, алты өлкөнүн курама командасы катышкан мелдеш ушул күндөрү Бишкек шаарында өтүп жатат.

 22-январда өткөн төртүнчү турдун алкагында кыргызстандыктар Люксембургдун курама командасы менен беттешип, 5:2 эсебинде ишенимдүү жеңишке жетишти. Бул жеңиш Кыргызстандын курама командасы үчүн турнирде катары менен төртүнчү болуп, команда турнирдик таблицада лидерлигин сактап калды.

Эске салсак, Кыргызстандын курама командасы 18-январда башталган оюнда - Гонконгдун (Кытай) (4:1); Түштүк Африка Республикасынын (7:2) жана Ирандын жаштар курама командалары менен беттешип (15:1), катары менен ишенимдүү жеңишке жетип келе жатышат.

Дүйнө чемпионатынын акыркы турунда кыргызстандыктар Мексиканын курама командасына каршы ойношу күтүлөт. Бул беттеш 24-январда өтөт.

Белгилей кетсек, хоккей боюнча U20 дүйнө чемпионаты 24-январга чейин уланат. Турнирде Кыргызстан, Мексика, Люксембург, Түштүк Африка, Иран жана Гонконг (Кытай) курама командалары күч сынашууда.