Кыргызстан менен Азербайжан айыл чарба инвестицияларын талкуулады
Бүгүн Суу ресурстары, айыл чарба жана кайра иштетүү өнөр жайы министрлиги Азербайжан–Кыргыз Өнүктүрүү Фондунун өкүлдөрү менен жолугушуу өткөрдү. Бул тууралуу министрликтен билдиришти.
Жолугушууга министрдин орун басары Б.Т. Бекболотов жана долбоорлорду ишке ашыруу жана мамлекеттик-жеке өнөктөштүк секторунун башчысы И.А. Анарбеков катышты. Фонддун атынан тең төрагалары жана башкармалыктын мүчөлөрү болду.
Жолугушуунун негизги темасы айыл чарба жана кайра иштетүү өнөр жайындагы инвестициялык кызматташтык маселелери болду. Тараптар агрардык сектордун учурдагы абалын жана биргелешкен долбоорлорду ишке ашыруунун келечектүү багыттарын талкуулашты.
Айрыкча айыл чарба өндүрүшүн модернизациялоо, заманбап технологияларды киргизүү, айыл чарба продукциясын кайра иштетүү, анын ичинде этти кайра иштетүү, мал тоюттарын өндүрүү, картошка өстүрүү жана күнөскана комплекстерин куруу маселелерине көңүл бурулду.
Азербайжан–Кыргыз Өнүктүрүү Фонду инвестициялык долбоорлорду ишке ашыруудагы тажрыйбасы менен бөлүшүп, Министрлик "Министрликтин 100 долбоору" программасынын алкагындагы потенциалдуу демилгелерди сунуштады.
Жолугушуунун жыйынтыгында тараптар биргелешкен инвестициялык долбоорлор боюнча консультацияларды улантуу тууралуу макулдашышты.
