Жети-Өгүздө 3 миллиондон ашык сом алдамчылык кылгандар кармалды
Жети-Өгүз районунда ири алдамчылыктын бети ачылганы тууралуу Ысык-Көл облустук милициясыдан билдиришти. Милицияга Дархан айылынын тургуну арыз менен кайрылып, белгисиз адамдар анын 37 баш коюн алып, жасалма "кызыл китеп" калтыруу менен 245 миң сомун бербей качып кеткенин билдирген.
Ыкчам иш-чаралардын натыйжасында - 1989-жылы туулган Н.Г., 1986-жылы туулган К.А. жана 1995-жылы туулган М.С. шектүү катары кармалды.
Алар ушундай эле жол менен дагы 9 жаранды алдаганы аныкталып, жалпы 10 кылмыш иши козголгон.
Жалпы чыгым 3 млн 342 миң сомду түзүп, анын 1 млн 598 миң сому жабырлануучуларга өндүрүлүп берилди.
Алдын ала суракта шектүүлөр күнөөлөрүн толугу менен мойнуна алышып, Жети-Өгүз райондук соту тарабынан аларга карата бир ай мөөнөткө камакка алуу түрүндөгү бөгөт чарасы тандалган.
