Бишкекке кошулган аймактарды өнүктүрүүнүн 5 жылдык планы сунушталды
Бишкек шаарынын мэриясы 2026-жылдын 19-январында административдик-аймактык реформа алкагында борбор калаага кошулган аймактарды өнүктүрүү боюнча 2026–2030-жылдарга карата Иш-чаралар планынын токтом долбоорун коомдук талкууга чыгарды.
2024-жылдын 18-июлундагы №128 Мыйзамына ылайык, Бишкек шаарынын карамагына 24 калктуу конушту камтыган 8 айыл аймагы өткөрүлүп берилип, шаардын аянты 12,9 миң гектардан 41 миң гектарга чейин кеңейди.
Шаарга 15 588,96 гектар айыл чарба багытындагы жерлер жана 87 социалдык объект кошулган. Ошол эле учурда жаңы аймактарда социалдык объектилердин жетишсиздиги, жолдордун жана инженердик тармактардын начар абалы аныкталган.
Бул маселелерди чечүү үчүн шаардын 4 району боюнча 5 жылдык Иш-чаралар планы иштелип чыгып, социалдык, жол жана инженердик инфраструктураны өнүктүрүү каралган. План республикалык жана жергиликтүү бюджеттердин, муниципалдык ишканалардын жана башка булактардын эсебинен ишке ашырылат.
Токтом долбоору боюнча сунуштарды 2026-жылдын 3-февралына чейин bishkek.atr@gmail.com дарегине жөнөтүүгө болот. Документ bishkek.gov.kg сайтында жайгаштырылган.
