Уюлдук телефон уурдагандар кармалды
Бишкек шаардык Ички иштер башкы башкармалыгынын кызматкерлери борбор калаадагы базарларда жасалган чөнтөк уурулуктардын сериясына тиешеси бар шектүүлөрдү кармашты.
Териштирүүгө 2025-жылдын 28-декабрында жаран А.А.нын Свердлов райондук ички иштер башкармалыгына кайрылуусу себеп болгон. Анын айтымында, Аламүдүн базарында белгисиз адамдар анын жашы жете элек кызынын курткасынын чөнтөгүнөн iPhone 12 Pro Max уюлдук телефонун уурдап, изин жашырып кетишкен.
Ыкчам-издөө иш-чараларынын жүрүшүндө милиция 1998-жылы туулган А.К. аттуу биринчи шектүүнү аныктап, кармаган. Кийинчерээк тергөө уурдалган уюлдук телефондор "Ош базарынын" аймагында экинчи шектүү — 2001-жылы туулган А.З. аттуу жаран менен биргеликте сатылганын аныктаган.
Экөө тең кармалып, Жазык-процессуалдык кодексинин 96-беренесинин негизинде Бишкек ШИИББнин убактылуу кармоочу жайына киргизилген.
Тинтүү иштеринин жүрүшүндө "Беш-Сары" соода борборунан мыйзамсыз жол менен алынган деп шектелген 20дан ашык уюлдук телефон табылып, алынып коюлган. Учурда кармалгандардын борбор калаанын базарларында жасалган бир катар чөнтөк уурулуктарга тиешеси бар экендиги аныкталды.
