Астанада Кыргызстандын элчилиги үчүн жер тилкеси бөлүнөт
Жогорку Кеңеш Кыргызстан менен Казакстандын ортосунда элчиликтер үчүн имараттарды жана жер тилкелерин өз ара акысыз пайдаланууга берүү боюнча мыйзам долбоорун үч окууда жактырды. Бул тууралуу "Кабар" маалымат агенттиги Тышкы иштер министринин орун басары Алмаз Имангазиевге шилтеме берүү менен жазды.
Мыйзам долбоору эки өлкөнүн дипломатиялык өкүлчүлүктөрүнүн муктаждыктарын камсыз кылуу максатында даярдалган. Тышкы иштер министринин орун басары Алмаз Имангазиевдин айтымында, документ келишимди юридикалык жактан бекемдөөгө багытталган.
Ага ылайык, Казакстан тарабы Астана шаарында Кыргызстандын элчилиги үчүн жаңы имарат куруу пландалган 12 сотых жер тилкесин жана жалпы аянты 1267 чарчы метр болгон имаратты 49 жылдык мөөнөткө акысыз пайдаланууга берет.
Өз кезегинде Кыргызстан Бишкек шаарындагы Чыңгыз Айтматов проспектисинде жайгашкан, учурда Казакстандын элчилиги колдонуп жаткан 75 сотых жер тилкесин, ошондой эле "Ала-Арча" турак жай комплексиндеги аянты 531 чарчы метр болгон коттеджди өткөрүп берди.
