Фермерлерге айыл чарба техникасын алуу үчүн жаңы шарттар сунушталды
Бүгүн Суу ресурстары, айыл чарба жана кайра иштетүү өнөр жайы министрлигинин Айыл чарбаны кооперациялоо, механизациялоо жана инновациялык технологиялар департаменти тарабынан дыйкан-фермерлер жана товар өндүрүүчүлөр үчүн айыл чарба техникасын алуу мүмкүнчүлүктөрүн тааныштыруу иш-чарасы өткөрүлдү.
Иш-чаранын жүрүшүндө министрликтин колдоосу менен "Айыл Банк" жана "Элдик Банк" аркылуу айыл чарба техникасынын бардык түрлөрүн жеңилдетилген шарттарда насыяга алуу мүмкүн экендиги тууралуу кеңири маалымат берилди.
Ошондой эле министрликтин өкүлдөрү "Автомаш Радиатор" ЖЧКсына барып, заманбап жана сапаттуу айыл чарба техникалары менен жеринен таанышышты. Иш-чаранын алкагында Талас облусунан келген дыйкан Эрнис Байызбек уулу 6%дык жеңилдетилген насыя менен айыл чарба техникасын сатып алды.
Мындан тышкары, "Автомаш Радиатор" компаниясынан алынган "Беларусь" трактору, дан жыйноочу комбайн, чөп таңгактоочу пресс-подборщик, сеялка, дары чачкыч жана башка айыл чарба техникалары жалпыга тааныштырылды.
"Автомаш Радиатор" ЖЧКсы КМШ жана Борбор Азия өлкөлөрүндө радиаторлорду жана жылуулук алмаштыргычтарды толук цикл менен өндүргөн алдыңкы ишканалардын бири болуп саналат. Ишкананын продукциясы эл аралык сапат стандарттарына жооп берет.
