Кыргызстан менен Түркия курулуш тармагындагы кызматташууну кеңейтет
Күн мурун Курулуш, архитектура жана турак жай-коммуналдык чарба министри Нурдан Орунтаев Түркия Республикасынын Кыргызстандагы Атайын жана Ыйгарым укуктуу Элчиси Мекин Мустафа Кемаль Өкем менен жолугушту. Бул тууралуу Курулуш министрлигинен билдиришти.
Жолугушууда Кыргызстан менен Түркиянын салттуу достук мамилелери, стратегиялык өнөктөштүктү өнүктүрүү, ошондой эле курулуш тармагында тажрыйба алмашуу жана биргелешкен долбоорлорду ишке ашыруу маселелери талкууланды.
Министр Нурдан Орунтаев түрк компанияларынын Кыргызстандын курулуш тармагын өнүктүрүүгө кошкон салымын белгилеп, турак жай жана инфраструктуралык курулушта, айрыкча жогорку сейсмикалык активдүүлүктү эске алуу менен коопсуз жана туруктуу объектилерди долбоорлоо багытында кызматташууну кеңейтүүгө кызыкдар экенин билдирди.
Өз кезегинде Түркиянын элчиси түрк тарап эки өлкөнүн мамлекеттик органдары жана ишкер чөйрөлөрүнүн ортосундагы практикалык кызматташтыкты тереңдетүүгө даяр экенин ырастады.
Жолугушуунун жыйынтыгында тараптар өз ара өнөктөштүктү мындан ары да өнүктүрүүгө жана кызыкчылык жараткан багыттар боюнча ишти улантууга макулдашты.
