Нарында бийик тоолуу аймактар үчүн жаңы жөлөкпулдун берилиши текшерилди
Эмгек, социалдык камсыздоо жана миграция министри Канат Сагынбаев Нарын облусуна жумушчу сапар менен барып, министрликтин аймактык башкармалыктарынын ишмердүүлүгү жана жаңы мамлекеттик ай сайынкы жөлөкпул — "Бийик тоолуу аймактардын жашоочуларына көмөк" (БТК) жөлөкпулун дайындоо процесси менен таанышты.
Ведомстводон билдиришкендей, сапардын алкагында министр Кочкор районуна барып, райондук эмгек, социалдык камсыздоо жана миграция башкармалыгынын ишин көрдү. Ал жөлөкпулду дайындоого тартылган кызматкерлер менен жолугушуп, жарандардын арыз берүүдө жана төлөмдөрдү тариздөөдө туш болуп жаткан маселелерин жеринде изилдеди.
Маалыматка ылайык, учурда Кочкор районунда 930 жаранга БТК жөлөкпулу боюнча төлөмдөрдү жүргүзүү пландалган.
Ошондой эле жумушчу сапардын жүрүшүндө аймактык бөлүмдөрдүн жергиликтүү мамлекеттик администрациялар жана Калкты тейлөө борборлору (КТБ) менен өз ара аракеттенүүсүн күчөтүү маселелерине өзгөчө көңүл бурулду. Бул социалдык кызматтардын жеткиликтүүлүгүн, ачык-айкындуулугун жана ыкчамдуулугун камсыздоого багытталган.
Сапардын жыйынтыгында социалдык программаларды ишке ашыруунун натыйжалуулугун жогорулатуу жана жер-жерлерде жаралган маселелерди өз убагында чечүү боюнча кошумча чаралар иштелип чыгат.
